2024 жылғы 30 қыркүйекте APEC PetroTechnic Жоғары колледжіне Оңтүстік Альберта технологиялық институтының (SAIT Polytechnic, Канада) және Қазақстандағы Канада елшілігінің өкілдері іссапармен келді. Сапардың негізгі мақсаты – APEC PetroTechnic қызметімен танысу және техникалық және кәсіптік білім беру саласындағы ынтымақтастықты кеңейту жолдарын талқылау болды.

Дөңгелек үстел барысында APEC PetroTechnic және SAIT Polytechnic арасындағы стратегиялық жоспарлар талқыланды. Оған Оңтүстік Альберта технологиялық институтының өкілі Моника Беннетт ханым, Қазақстандағы Канада елшілігінің кеңесшісі Юргита Рушките ханым, «Talap» КеАҚ вице-президенті Байдженов Ерлан, ТжКБ жүйесінің қызметін зерттеу және мониторинг басқармасының бастығы Нигметжанова Марал және колледж басшылығы қатысты.

Колледж директоры А.Д.Нурмышев оқу орнының қызметі мен APEC PetroTechnic-тің алдағы жоспарлары туралы баяндады. Сапар аясында қонақтар колледждің материалдық-техникалық базасымен танысып, TBLT/BOPPPS технологиялары бойынша білім беру бағдарламаларын жүзеге асыратын оқытушылардың сабақтарына, сондай-ақ арнайы пәндер бойынша зертханалық және практикалық сабақтарға қатысты.

Бағдарлама аясында колледж оқытушылары мен студенттерімен кездесу ұйымдастырылды. SAIT Polytechnic-те дайындықтан өткен оқытушылар канадалық нұсқаушылармен бірлескен жұмыстары және Оңтүстік Альберта технологиялық институтында тағылымдамадан өту тәжірибесімен бөлісті. SAIT Polytechnic өкілі Моника Беннетт ханым қатысушыларға институттың негізгі бағыттары мен техникалық бағдарламаларын таныстырды. Студенттер өздерін қызықтырған сұрақтарын қойып, нақты жауаптар алды.

Сапар соңында тараптар бірлескен академиялық бағдарламаларды жүзеге асыруға және кадрлар даярлауда ынтымақтастықты жалғастыруға қызығушылықтарын білдіріп, бірқатар перспективалы жобаларды талқылады.

Анықтама: Оңтүстік Альберта технологиялық институты (SAIT Polytechnic) – Канададағы ең ірі және ежелгі оқу орындарының бірі. Ол 1916 жылы негізі қаланған және Канададағы мұнай-газ өнеркәсібінің орталығында орналасқан. SAIT Polytechnic мұнай-газ саласында кадрлар даярлау бойынша әлемдік көшбасшылардың бірі болып саналады. 2012-2016 жылдар аралығында SAIT Polytechnic APEC PetroTechnic үшін кадрлар даярлау және оқытуды ұйымдастыру бойынша бірқатар қызметтер атқарды, соның ішінде мұнай-газ саласындағы ағымдағы қажеттіліктерді ескере отырып, модульдік-құзыреттілік тәсілге негізделген 12 білім беру бағдарламасын әзірледі. Сонымен қатар, қазақстандық оқытушылардың біліктілігін арттыру және SAIT Polytechnic біліктілік талаптарына сай студенттерді іріктеу процесін қамтамасыз етті.

APEC PetroTechnic өзінің қызметін табысты жалғастырып, Қазақстанның білім беру нарығында көшбасшы орынға ие болды. Бүгінде колледж түлектерінің 90%-ы елдегі жетекші мұнай-газ компанияларында жұмыс істейді.