Тауарларды, жұмыстарды және көрсетілетін қызметтерді сатып алу қағидалары

«Talap» КЕАҚ Президентінің

2024 жылғы 18 қазандағы  №349 бұйрығымен

«Бекітілді»

«Talap» коммерциялық емес акционерлік қоғамында және оның еншілес ұйымдарында мемлекеттік тапсырманы орындау шеңберінде тауарларды, жұмыстарды және қызметтерді сатып алу ЕРЕЖЕЛЕРІ

 

1. Жалпы ережелер
2. «Talap» коммерциялық емес акционерлік қоғамында мемлекеттік тапсырманы орындау шеңберінде тауарларды, жұмыстарды және қызметтерді сатып алу ережелері (бұдан әрі – Ережелер) Қазақстан Республикасының 2008 жылғы 4 желтоқсандағы № 95-IV Бюджет кодексіне, «Мемлекеттік сатып алу туралы» Қазақстан Республикасының 2015 жылғы 4 желтоқсандағы № 434-V Заңына, Қазақстан Республикасы Қаржы министрінің 2015 жылғы 30 наурыздағы № 236 «Мемлекеттік тапсырманы әзірлеу және орындау қағидаларын бекіту туралы» бұйрығына сәйкес әзірленген және Қоғамның құрылымдық бөлімшелерінің, еншілес ұйымдарының мемлекеттік тапсырманы орындау шеңберінде тауарларды, жұмыстарды және қызметтерді сатып алуды ұйымдастыру және өткізу кезіндегі қызметін реттеуге бағытталған.
3. Осы Ережелер мемлекеттік тапсырманы орындау шеңберінде жүзеге асырылатын тауарларды, жұмыстарды және қызметтерді сатып алуды ұйымдастыру және өткізу рәсімдерін реттейді.
4. Мемлекеттік тапсырманы орындау шеңберінде сатып алуды ұйымдастыру деп Тапсырыс берушінің қызметін үздіксіз қамтамасыз етуге және тауарларды, жұмыстарды және қызметтерді сатып алу үшін жағдай жасауға бағытталған, Қоғамның құрылымдық бөлімшелері, еншілес ұйымдары орындайтын іс-шаралар кешені түсініледі.
5. Осы Ережелерде төменде көрсетілген анықтамалар мынадай мағыналарға ие:

• Тапсырыс беруші – «Talap» коммерциялық емес акционерлік қоғамы (бұдан әрі – Қоғам) және оның еншілес ұйымдары;
• сатып алу – Тапсырыс берушілердің қызмет етуін, сондай-ақ Тапсырыс берушінің функцияларын не жарғылық қызметін орындауын қамтамасыз ету үшін қажетті бюджет қаражаты және (немесе) меншікті кірістері есебінен қызметтерді, Қазақстан Республикасының азаматтық заңнамасында және Ережелерде белгіленген тәртіппен жүзеге асырылатын сатып алуы
• әлеуетті өнім беруші – кәсіпкерлік қызметті жүзеге асыратын жеке тұлға, заңды тұлға (егер Қазақстан Республикасының заңдарында олар үшін өзгеше белгіленбесе, мемлекеттік мекемелерді қоспағанда), заңды тұлғалардың уақытша бірлестігі (консорциум), сатып алу туралы шарт жасасуға үміткер;
• өнім беруші – кәсіпкерлік қызметті жүзеге асыратын жеке тұлға, заңды тұлға (егер Қазақстан Республикасының заңдарында олар үшін өзгеше белгіленбесе, мемлекеттік мекемелерді қоспағанда), заңды тұлғалардың уақытша бірлестігі (консорциум), Тапсырыс берушімен жасалған сатып алу туралы шартта оның контрагенті ретінде әрекет ететін тұлға;
• комиссия – мемлекеттік сатып алу және мемлекеттік тапсырманы орындау шеңберінде жүзеге асырылатын сатып алу рәсімін өткізу үшін Тапсырыс беруші құратын алқалы орган;
• әлеуетті өнім берушінің үлестес тұлғасы – әлеуетті өнім берушінің шешімдерін айқындауға және (немесе) ол қабылдайтын шешімдерге ықпал етуге құқығы бар кез келген жеке немесе заңды тұлға, оның ішінде жазбаша нысанда жасалған мәміле күшіне орай, сондай-ақ әлеуетті өнім берушінің осындай құқығы бар кез келген жеке немесе заңды тұлғаға қатысты жеке немесе заңды тұлға;
• құрылымдық бөлімше – мемлекеттік тапсырманы орындау шеңберінде сатып алуды өткізу үшін жағдай жасауға бағытталған іс-шараларды уақтылы және тиімді орындауға жауапты филиалдар, басқармалар, бөлімдер, қызметтер;
• еншілес ұйымдар – «Talap» КеАҚ олардың жарғылық капиталына басым қатысуы салдарынан не олардың арасында жасалған шартқа сәйкес, не өзгеше түрде Қазақстан Республикасының заңнамасында көзделген шешімдерін айқындау мүмкіндігі бар заңды тұлғалар.

5. Осы Ережелердің ережелері Қоғамның барлық құрылымдық бөлімшелеріне, сондай-ақ оның еншілес ұйымдарына қолданылады.
6. Тауарларды, жұмыстарды және қызметтерді сатып алуды ұйымдастыру және өткізу мынадай дәйекті іс-қимылдарды жүргізуді көздейді:

• тауарларды, жұмыстарды, қызметтерді сатып алуды өткізу туралы шешім қабылдау, комиссия құрамын, қажет болған жағдайда сараптамалық комиссияны (сарапшыны) бекіту, комиссия хатшысын айқындау, сатып алынатын тауарлардың, жұмыстардың және қызметтердің техникалық ерекшелігін бекіту;
• сатып алуды өткізу туралы хабарландыруды Тапсырыс берушінің интернет-ресурсында жариялау. Әлеуетті өнім берушілердің қатысуға өтінімдерін тіркеуді Тапсырыс беруші жүргізеді;
• комиссия хатшысының баға ұсыныстары бар конверттерді ұсынған қатысушыларды, сондай-ақ баға ұсыныстары бар конверттерді ашу рәсіміне қатысуға ниет білдірген тұлғаларды тіркеу журналында тіркеуі;
• әлеуетті өнім берушілердің баға ұсыныстары бар конверттерді ашу, қорытындыларын шығару, қорытындылар туралы хаттаманы ресімдеу, қол қою және Тапсырыс берушінің интернет-ресурсында орналастыру;
• жеңімпазбен сатып алу туралы шарт жасасу.

7. Сатып алуға қатысуға байланысты шектеулер.

• Әлеуетті өнім беруші, егер: осы әлеуетті өнім берушінің басшыларының және (немесе) осы әлеуетті өнім берушінің уәкілетті өкілінің жақын туыстары, жұбайы (зайыбы) немесе жекжаттары өнім берушіні таңдау туралы шешім қабылдау құқығына ие болса не өткізілетін сатып алуда тапсырыс берушінің немесе сатып алуды ұйымдастырушының өкілі болып табылса, өткізілетін сатып алуға қатысуға құқылы емес;
• Әлеуетті өнім беруші және (немесе) оның қосалқы мердігері Әлеуетті өнім берушілердің (өнім берушілердің) біртұтас тізілімінде және (немесе) Мемлекеттік сатып алуға жосықсыз қатысушылардың тізілімінде тұрса;
• Консорциумға кіретін заңды тұлға Әлеуетті өнім берушілердің (өнім берушілердің) біртұтас тізілімінде және (немесе) Мемлекеттік сатып алуға жосықсыз қатысушылардың тізілімінде тұрса;
• Әлеуетті өнім берушінің және (немесе) ол тартатын қосалқы мердігердің (бірлесіп орындаушының) қаржы-шаруашылық қызметі Қазақстан Республикасының заңнамасына сәйкес не Қазақстан Республикасының бейрезиденті әлеуетті өнім берушінің мемлекетінің заңнамасына сәйкес тоқтатыла тұрса;
• Сатып алуға қатысуға үміткер әлеуетті өнім берушінің басшысы Әлеуетті өнім берушілердің (өнім берушілердің) біртұтас тізілімінде және (немесе) Мемлекеттік сатып алуға жосықсыз қатысушылардың тізілімінде тұрған заңды тұлғаларды басқарумен, құрумен, олардың жарғылық капиталына қатысумен байланысты болса;
• Сатып алуға қатысуға үміткер әлеуетті өнім берушінің басшысы Әлеуетті өнім берушілердің (өнім берушілердің) біртұтас тізілімге және (немесе) Мемлекеттік сатып алуға жосықсыз қатысушылардың тізіліміне енгізілген, кәсіпкерлік қызметті жүзеге асыратын жеке тұлға болып табылса;
• Сатып алуға қатысуға үміткер, кәсіпкерлік қызметті жүзеге асыратын жеке тұлға болып табылатын әлеуетті өнім беруші Мемлекеттік сатып алуға жосықсыз қатысушылардың тізіліміне енгізілген әлеуетті өнім берушінің басшысы болып табылса.
• Әлеуетті өнім берушінің және әлеуетті өнім берушімен үлестес тұлғаның бір сатып алуға (лотқа) қатысуға құқығы жоқ.

8. Осы Ережелердің 7-тармағының 1)-8) тармақшаларының талаптарын бұзу сатып алуды жүзеге асырудың кез келген сатысында сақталуға тиіс.
9. Тапсырыс беруші сатып алудың кез келген кезеңінде Сатып алу жоспарында көзделген тауарларды, жұмыстарды, қызметтерді сатып алуға арналған шығыстардың қысқартылуы, қажеттіліктің негізді түрде азаюы немесе тауарларды, жұмыстарды, қызметтерді сатып алудың орынсыздығы жағдайларында сатып алуды жүзеге асырудан бас тартуға құқылы.

Бұл жағдайда Тапсырыс беруші сатып алуды жүзеге асырудан бас тарту туралы шешім қабылданған күннен бастап 3 (үш) жұмыс күні ішінде өткізіліп жатқан сатып алуға қатысушы тұлғаларға бұл туралы хабарлауға және Тапсырыс берушінің интернет-ресурсында тиісті хабарландыру жариялауға міндетті;

Тапсырыс берушінің сатып алуды жүзеге асырудан бас тарту туралы шешіміне шағым жасалмайды.

10. Тапсырыс беруші сатып алуды жүзеге асыру кезінде:

• Тауарларды, жұмыстарды, қызметтерді біртектілігі, олардың ұқсас сипаттамалары мен компоненттері бойынша немесе оларды жеткізу (орындау, көрсету) орны бойынша лоттарға бөлуге;
• Бір лотта күрделі техникалық сипаттамалары мен ерекшеліктері бар және бірнеше өзара байланысты компоненттерден тұратын тауарларды, жұмыстарды, қызметтерді сатып алуды көздеуге құқылы.

Әлеуетті өнім берушінің сатып алуға қатысуға ұсынған құжаттарын қарау, сондай-ақ жеңімпазды анықтау әрбір лот бойынша жеке жүзеге асырылады.

11. Әлеуетті өнім беруші сатып алуға қатысуына байланысты барлық шығыстарды көтереді. Тапсырыс беруші сатып алу қорытындыларына қарамастан, осы шығыстарды өтеу бойынша міндеттемелер көтермейді.

2. Қолданылу саласы

 

12. Осы Ережелер мемлекеттік тапсырманы орындау бойынша Сатып алудың жылдық жоспарын қалыптастыруға қатысатын Қоғамның және оның еншілес ұйымдарының барлық құрылымдық бөлімшелеріне, сондай-ақ сатып алуды жүзеге асыру процесінде міндетті түрде қолданылады, мыналарды:

• жеке тұлғалардан еңбек шарттары бойынша не кәсіпкерлік қызмет субъектілері болып табылмайтын жеке тұлғалардан, оның ішінде жеке нотариустардың, жеке сот орындаушылардың және жеке адвокаттардың қызметтерін ақылы қызмет көрсету шарттары бойынша жұмыстарды, қызметтерді сатып алуды;
• Қазақстан Республикасының халықаралық шарттарына сәйкес, сондай-ақ Қазақстан Республикасы мүшесі болып табылатын халықаралық ұйымдар қаржыландыратын инвестициялық жобаларды іске асыру шеңберінде жүзеге асырылатын тауарларды, жұмыстарды, қызметтерді сатып алуды;
• алымдар мен төлемдерді төлеуді;
• іссапар шығыстарын өтеуді;
• Қазақстан Республикасының Ұлттық Банкі, Қазақстан Республикасының заңнамасына сәйкес алынған лицензиялар негізінде банк операцияларының жекелеген түрлерін жүзеге асыратын банктер мен ұйымдар жүзеге асыратын банк операцияларын жүргізумен байланысты қаржылық қызметтерді сатып алуды;
• мерзімді баспа басылымдарына жазылуды қоса алғанда, қағаз және (немесе) электрондық жеткізгіштердегі мерзімді баспа басылымдарын сатып алуды;
• шетелдік және отандық бұқаралық ақпарат құралдарында ақпарат орналастыру бойынша қызметтерді сатып алуды;
• отандық және шетелдік баспа басылымдарында мақалалар жариялауды;
• әуе, теміржол, өзен, теңіз және автобус жол жүру құжаттарын (билеттерін) брондау, ресімдеу және сату бойынша қызметтерді сатып алуды;
• кедендік өкілдердің қызметтерін сатып алуды, уақытша сақтау қоймаларының (УСҚ) алымдары мен басқа да төлемдерін төлеуді қоспағанда.

3. Мемлекеттік тапсырманы орындау шеңберінде жүзеге асырылатын сатып алу

 

13. Сатып алуды ұйымдастыру жөніндегі іс-шаралар кешені мыналарды қамтиды:

• республикалық бюджеттік бағдарламалар әкімшісі мен мемлекеттік тапсырманы орындаушы арасында жасалған азаматтық-құқықтық мәміле негізінде тауарларды, жұмыстарды және қызметтерді сатып алудың жылдық жоспарын әзірлеу, келісу, бекіту және оған өзгерістер мен толықтырулар енгізу;
• комиссия құрамын, қажет болған жағдайда сараптамалық комиссияны (сарапшыны) бекіту, комиссия хатшысын айқындау. Бұл шешім сатып алуды жүзеге асырушы Тапсырыс берушінің бірінші басшысының немесе оны алмастыратын тұлғаның бұйрығы түрінде ресімделеді;
• тауарларды, жұмыстарды, қызметтерді сатып алу туралы шарт жобаларын бекіту;
• сатып алу рәсімдерін өткізу және өнім берушіні таңдау;
• сатып алу туралы шарт жасасу;
• шартты орындау.

14. Сатып алу мемлекеттік тапсырманы орындау шеңберінде тауарларды, жұмыстарды, қызметтерді сатып алудың бекітілген жылдық жоспары негізінде жүзеге асырылады.
15. Республикалық бюджеттік бағдарламалар әкімшісі мен мемлекеттік тапсырманы орындаушы арасында жасалған азаматтық-құқықтық мәміле негізінде Тапсырыс беруші осы Ережелерде айқындалған тәртіппен және нысанда сатып алудың жылдық жоспарын әзірлейді және бекітеді.
16. Сатып алу мәселелері жөніндегі құрылымдық бөлімше (лауазымды тұлға) оны бекіту туралы бұйрық жобасын әзірлейді, оған мемлекеттік тапсырманы орындау шеңберінде Жылдық сатып алу жоспарын қоса береді. Оларды сатып алуды бастамашылық ететін құрылымдық бөлімшелердің басшыларымен келіседі және Тапсырыс берушінің Бірінші басшысының немесе оны алмастыратын адамның бекітуіне жібереді.
17. Құрылымдық бөлімшелер (лауазымды тұлға) республикалық бюджеттік бағдарламалар әкімшісі мен мемлекеттік тапсырманы орындаушы арасында жасалған азаматтық-құқықтық мәміле негізінде тауарларды, жұмыстарды және қызметтерді сатып алудың Жылдық жоспарына өзгерістер және (немесе) толықтырулар енгізуге бастамашылық жасауға құқылы.
18. Құрылымдық бөлімшелер (лауазымды тұлға) қызметтік жазба негізінде мемлекеттік тапсырманы орындау шеңберінде тауарларды, жұмыстарды және қызметтерді сатып алудың Жылдық жоспарына өзгерістер және (немесе) толықтырулар енгізуге бастамашылық жасайды.

Қызметтік жазба Бірінші басшының немесе оны алмастыратын адамның атына ресімделеді, өзгерістер және (немесе) толықтырулар енгізуге бастамашылық жасайтын құрылымдық бөлімшенің (лауазымды тұлғаның) басшысымен және орындаушысымен, экономикалық жоспарлау мәселелерін үйлестіретін бөлімшемен (лауазымды тұлғамен), Бірінші басшының жетекшілік ететін орынбасарымен келісіледі.

19. Тауарларды, жұмыстарды және қызметтерді сатып алудың Жылдық жоспарына барлық өзгерістер және (немесе) толықтырулар экономикалық жоспарлау мәселелерін үйлестіретін бөлімшенің (лауазымды тұлғаның) қызметтік жазбасы негізінде Бірінші басшының немесе оның міндетін атқаруға уәкілеттік берілген адамның бұйрығымен бекітіледі.
20. Мемлекеттік тапсырманы орындау шеңберінде тауарларды, жұмыстарды, қызметтерді сатып алудың бекітілген Жылдық жоспарында көзделмеген тауарларды, жұмыстарды, қызметтерді сатып алуға жол берілмейді.
21. Техникалық ерекшелікті жауапты лауазымды тұлға қазақ және орыс тілдерінде ұлттық стандарттарды, ал олар болмаған жағдайда сатып алынатын тауарларға, жұмыстарға, қызметтерге мемлекетаралық стандарттарды көрсете отырып әзірлеуге тиіс.
22. Сатып алынатын тауарлардың, жұмыстардың және қызметтердің техникалық ерекшелігі сатып алуды бастамашылық еткен құрылымдық бөлімшенің (лауазымды тұлғаның) басшысымен және орындаушысымен электрондық құжат айналымы жүйесі арқылы келісілуге тиіс.
23. Техникалық ерекшелік қосымша қағаз тасымалдағышта ұсынылады, онда әрбір парақ сатып алуды бастамашылық еткен құрылымдық бөлімшенің басшысы мен орындаушысы қол қойып, парақ-парақ бекітілуге тиіс.

Сатып алуды бастамашылық еткен құрылымдық бөлімше (лауазымды тұлға) осы Ережелердің 21-тармағында көзделген бөлігінде техникалық ерекшелік жобасының мазмұны үшін жауапты болады.

24. Тауарларды, жұмыстарды, қызметтерді сатып алуға арналған хабарландыруда тауар таңбаларына, қызмет көрсету белгілеріне, фирмалық атауларға, патенттерге, пайдалы модельдерге, өнеркәсіптік үлгілерге, тауардың шығарылған жері атауына және өндірушінің атауына, сондай-ақ сатып алынатын тауардың, жұмыстың, көрсетілетін қызметтің жекелеген әлеуетті өнім берушіге тиесілігін айқындайтын өзге де сипаттамаларға нұсқаулардың болуына жол берілмейді, бұған мыналар:
    • негізгі (орнатылған) жабдықты толықтыру, жаңғырту және қосымша жабдықтау, қолданылуы және үйлесімділігі үшін, сондай-ақ одан әрі техникалық сүйемелдеу, сервистік қызмет көрсету және жөндеу, оның ішінде негізгі (орнатылған) жабдықты жоспарлы жөндеу үшін тауарларды сатып алу;
    • тапсырыс берушінің негізгі (орнатылған) жабдығын пайдалану, техникалық сүйемелдеу, сервистік қызмет көрсету және жөндеу, оның ішінде жоспарлы жөндеумен байланысты жұмыстарды, көрсетілетін қызметтерді орындау (көрсету) жағдайлары қосылмайды.
25. Тапсырыс беруші үшін қажетті, мемлекеттік тапсырманы орындау шеңберіндегі тауарларды, жұмыстарды және қызметтерді сатып алу бекітілген тауарларды, жұмыстарды және қызметтерді сатып алудың Жылдық жоспары негізінде және Қазақстан Республикасының бюджет заңнамасына сәйкес, мемлекеттік сатып алу туралы Қазақстан Республикасының заңнамасында көзделген конкурстық рәсімдерді сақтамай жүзеге асырылады.

4. Мемлекеттік тапсырманы орындау шеңберінде тауарларды, жұмыстарды, қызметтерді сатып алуды жүзеге асыру тәртібі

 

26. Сатып алуға қатысу үшін әлеуетті өнім беруші әрекетке қабілетті (заңды тұлғалар үшін), азаматтық әрекетке қабілетті (жеке тұлғалар үшін) болуға тиіс.
27. Тауарларды, жұмыстарды, қызметтерді сатып алуды жүргізу, комиссия құрамын бекіту, комиссия хатшысын айқындау туралы шешім Тапсырыс берушінің Бірінші басшысының немесе оны алмастыратын адамның бұйрығы нысанында ресімделеді.
28. Комиссия құрамына төраға, төрағаның орынбасары және комиссия мүшелері кіреді. Төраға болмаған кезде оның функцияларын комиссия төрағасының орынбасары орындайды.

Комиссия төрағасы Тапсырыс берушінің бірінші басшысы, не бірінші басшының орынбасары, не көрсетілген адамдарды алмастыратын адам болып табылады.

29. Комиссия оны құру туралы шешім күшіне енген күннен бастап әрекет етеді және шарт жасалған сәттен бастап өз қызметін тоқтатады.

Комиссия отырыстары комиссия мүшелерінің жай көпшілігінің қатысуы шартымен өткізіледі және сатып алу қорытындылары хаттамасымен ресімделеді.

Комиссия мүшелерінің жай көпшілігі болмаған жағдайда, Тапсырыс берушінің бірінші басшысы кворумға қол жеткізу мақсатында (тиісті бұйрық шығару арқылы) комиссия мүшелерінің болмағандарын алмастыруды жүргізеді.

Комиссияның болмаған хатшысын алмастыруды Тапсырыс берушінің бірінші басшысы міндетті түрде жүргізеді.

30. Комиссияның шешімі ашық дауыс беру арқылы қабылданады және егер оған отырысқа қатысып отырған комиссия мүшелерінің жалпы санының көпшілігі дауыс берсе, қабылданды деп есептеледі.

Комиссия мүшелерінің дауыстары тең болған жағдайда комиссия төрағасының, ал ол болмаған жағдайда комиссия төрағасы орынбасарының дауысы шешуші болып табылады.

Комиссияның шешімімен келіспеген жағдайда комиссияның кез келген мүшесі ерекше пікірін жазбаша түрде беруге құқылы, ол қорытындылар хаттамасына қоса тіркелуге тиіс.

31. Комиссияның ұйымдастырушылық қызметін комиссия хатшысы қамтамасыз етеді.

Комиссия хатшысы комиссия мүшесі болып табылмайды және комиссия шешімдер қабылдаған кезде дауыс беру құқығы жоқ.

32. Осы Ереженің 10-тармағының 2) тармақшасында көрсетілген жағдайларда баға ұсыныстарын қарау, салыстыру және бағалау, сондай-ақ сатып алу жеңімпазын анықтау әрбір лот бойынша жүзеге асырылады.
33. Тапсырыс беруші баға ұсыныстарын ұсынудың соңғы мерзіміне дейін 5 (бес) жұмыс күнінен кешіктірмей тиісті хабарландыруды Тапсырыс берушінің интернет-ресурсында орналастыруға тиіс.
34. Әлеуетті өнім берушінің баға ұсынысы хабарландыруда көзделген талаптарды сақтай отырып, тауарды жеткізуді, жұмыстарды орындауды, қызметтерді көрсетуді жүзеге асыруға оның келісімін білдіру нысаны болып табылады.
35. Сатып алуға қатысуға ниет білдірген әлеуетті өнім беруші хабарландыруда көрсетілген мерзімде мынадай құжаттарды қамтитын тек бір ғана баға ұсынысын береді:
    • хабарландыруға қосымшаға сәйкес нысан бойынша әлеуетті өнім берушінің қолы қойылған және мөрімен (бар болса) куәландырылған баға ұсынысы.

Әлеуетті өнім берушінің баға ұсынысына тауарларды жеткізуге, жұмыстарды орындауға, қызметтерді көрсетуге байланысты барлық шығыстар қосылады.

• заңды тұлғаны мемлекеттік тіркеу (қайта тіркеу) туралы куәліктің түпнұсқасы немесе нотариат куәландырған көшірмесі не заңды тұлғаны мемлекеттік тіркеу (қайта тіркеу) туралы анықтаманың ресми интернет көзінен (e.gov.kz) алынған электрондық көшірмесі; жеке тұлға үшін – тиісті мемлекеттік орган берген, заңды тұлға құрмай кәсіпкерлік қызметті жүзеге асыру құқығын беретін құжаттың түпнұсқасы немесе нотариат куәландырған көшірмесі не ресми интернет көзінен (www.e.gov.kz) алынған құжаттың көшірмесі;
• Қазақстан Республикасының заңнамасында көзделген, әлеуетті өнім берушінің сатып алынатын тауарларды өндіруге, қайта өңдеуге, жеткізуге және өткізуге, жұмыстарды орындауға, қызметтерді көрсетуге құқығын растайтын лицензиялардың не электрондық құжат нысанындағы лицензиялардың және/немесе патенттердің, куәліктердің, сертификаттардың, рұқсаттардың, басқа да құжаттардың түпнұсқалары немесе нотариат куәландырған көшірмелері (хабарландыру шарттарында міндетті түрде лицензиялануға жататын қызмет болжанған жағдайда);
• техникалық ерекшелік (хабарландыру шарттарында техникалық ерекшелік көзделген жағдайда)
• тапсырыс берушінің техникалық ерекшелігінің талаптарына сәйкес ресімделген өзге де құжаттар (хабарландыру шарттарында техникалық ерекшелік көзделген жағдайда).

36. Қазақстан Республикасының бейрезиденті әлеуетті өнім беруші хабарландыруда көзделген, Қазақстан Республикасының резиденттері ұсынатын құжаттарды не ұқсас мәліметтерді қамтитын құжаттарды, тауарларды, жұмыстарды, қызметтерді баға ұсыныстарын сұрату тәсілімен сатып алуды жүзеге асыру туралы хабарландыру тіліне нотариат куәландырған аудармасымен бірге ұсынады.
37. Баға ұсынысында қамтылған тауарларды жеткізу, жұмыстарды орындау, қызметтерді көрсету шарттары Тапсырыс беруші орналастырған тауарларды, жұмыстарды, қызметтерді сатып алуды жүзеге асыру туралы хабарландыруда қамтылған шарттарға қайшы келмеуге тиіс.
38. Баға ұсынысы бар желімделген конверттің беткі жағында әлеуетті өнім беруші мыналарды көрсетуге тиіс:
39. Әлеуетті өнім берушінің атауы және пошталық мекенжайы;
40. Тапсырыс берушінің атауы және пошталық мекенжайы, олар хабарландыруда көрсетілген ұқсас мәліметтерге сәйкес келуге тиіс;
41. Әлеуетті өнім берушінің баға ұсынысы берілетін тауарларды, жұмыстарды, қызметтерді сатып алу атауы.
42. Тапсырыс беруші:
43. баға ұсынысы бар конвертте осы Ереженің 38-тармағында көзделген мәліметтердің бар-жоғын тексереді. Осы Ереженің көрсетілген тармағының талаптарын бұза отырып ресімделген баға ұсыныстары бар конверттер тіркелуге жатпайды.
44. тиісінше ресімделген баға ұсыныстары бар конверттерді қабылдайды және баға ұсыныстарын тіркеу журналына енгізеді.
45. Оны ұсынудың түпкілікті мерзімі өткеннен кейін ұсынылған баға ұсынысы бар конверт қабылданбайды.
46. Баға ұсыныстары бар конверттерді тіркеу журналы тігілуге, беттері нөмірленуге, баға ұсыныстарын тіркеу журналының соңғы беті сатып алу мәселелері жөніндегі құрылымдық бөлімшенің (лауазымды адамның) басшысының қолымен және Тапсырыс берушінің мөрімен бекітілуге тиіс.

 

5.Баға ұсыныстарын ашу және қарау

 

42. Әлеуетті өнім берушілер не олардың уәкілетті өкілдері баға ұсыныстарын ашу жөніндегі комиссия отырыстарына қатысуға құқылы (электрондық сатып алуды жүзеге асыру кезінде қолданылмайды).
43. Комиссия отырысы басталғанға дейін комиссия хатшысы әлеуетті өнім берушілердің өкілдерінің баға ұсыныстарын ашу рәсімін жүзеге асыру кезінде әлеуетті өнім берушілердің мүдделерін білдіруге құжатпен ресімделген өкілеттіктерін тексереді.
44. Баға ұсыныстарын ашу хабарландыруда көрсетілген күні, уақытта және орында жүргізіледі.

Комиссия хатшысы айқындаған тұлға баға ұсыныстары бар конверттерді ашады және әлеуетті өнім берушілер бағаұсыныстарында мәлімдеген бағаларды жария етеді.

46. Баға ұсыныстарын ашу рәсіміне қатысып отырған әлеуетті өнім берушілердің уәкілетті өкілдері баға ұсыныстарында әлеуетті өнім берушілер мәлімдеген бағалар жария етілгеннен кейін тиісті баға ұсыныстарына қол қоя отырып, басқа әлеуетті өнім берушілер мәлімдеген бағалармен танысуға құқылы.
47. Жеңімпаз комиссия ең төмен баға ұсынысы негізінде анықталады. Салыстыру қорытындылары бойынша екінші орын алған әлеуетті өнім беруші ең төмен баға ұсынысынан кейінгі баға ұсынысы негізінде комиссия анықтайды.
48. Егер ең төмен баға ұсынысын бірнеше әлеуетті өнім беруші ұсынған болса, баға ұсынысы басқа әлеуетті өнім берушілердің баға ұсыныстарынан бұрын келіп түскен әлеуетті өнім беруші жеңімпаз деп танылады.
49. Әлеуетті өнім берушінің баға ұсынысы, егер:
50. ол осы тауарларды, жұмыстарды, қызметтерді сатып алу үшін бөлінген сомадан асып кетсе;
51. әлеуетті өнім беруші хабарландыру талаптарына сәйкес келмейтін баға ұсынысының құрамында құжаттарды, мәліметтерді ұсынса;
52. әлеуетті өнім беруші бірнеше баға ұсынысын ұсынса;
53. әлеуетті өнім беруші мемлекеттік сатып алуға жосықсыз қатысушылардың тізілімінде тұрса, қабылданбайды.

Баға ұсыныстарын өзге негіздер бойынша қабылдамауға жол берілмейді.

50. Сатып алу мынадай жағдайларда:
51. баға ұсыныстары қабылданбағаннан кейін бір ғана баға ұсынысы қалса;
52. қабылданбағаннан кейін бірде-бір баға ұсынысы қалмаса;
53. екіден аз баға ұсынысы келіп түскен жағдайда;
54. жеңімпаз бен екінші орын алған әлеуетті өнім беруші шарт жасасудан жалтарған жағдайда өткізілмеді деп танылады.
55. Сатып алу өткізілмеді деп танылған жағдайда Комиссия мынадай шешімдердің бірін қабылдауға құқылы:
56. сатып алуды қайта өткізу туралы;
57. елеулі шарттарды өзгерту және сатып алуды қайта өткізу туралы;
58. жалғыз қатысушымен шарт жасасу туралы;
59. Тапсырыс беруші баға ұсыныстары ашылған күннен бастап 2 (екі) жұмыс күні ішінде сатып алу қорытындылары туралы хаттаманы ресімдеуге міндетті.
60. Тапсырыс беруші сатып алу қорытындылары ресімделген күннен бастап 2 (екі) жұмыс күнінен кешіктірмей қорытындылар туралы хаттаманы Тапсырыс берушінің интернет-ресурсында орналастыруға міндетті.
61. Өткізілген сатып алуда оның қорытындыларына (жеңімпазды анықтауға) әсер еткен бұзушылықтар анықталған жағдайда, комиссия шарт жасалғанға дейін сатып алу қорытындыларын жою міндетті, бұл ретте сатып алу қайта өткізілуге тиіс.
62. Егер әлеуетті өнім беруші Тапсырыс беруші белгілеген мерзімде Тапсырыс берушіге қол қойылған сатып алу туралы шартты ұсынбаса, Тапсырыс беруші осындай баға ұсынысын ұсынған әлеуетті өнім берушімен, ал осындай әлеуетті өнім беруші болмаған жағдайда сатып алу туралы шарт жасасудан жалтарған әлеуетті өнім беруші ұсынған бағадан кейін ең төмен баға ұсынысы болып табылатын әлеуетті өнім берушімен сатып алу туралы шарт жасасуға құқылы.

6.Сатып алудың қосымша әдістері

56. Шарттық міндеттемелерді сапалы орындауды қамтамасыз ету және қаражатты тиімді пайдалану мақсатында Тапсырыс беруші осы Ережелерде және мемлекеттік сатып алу порталында көзделген әдістерден басқа әдістермен тауарларды, жұмыстарды және қызметтерді сатып алуды жүзеге асыруға құқылы.
57. Сатып алудың қосымша әдістеріне, оның ішінде әлеуетті өнім берушілерден кемінде үш баға ұсынысын жинау негізінде нарықты салыстырмалы талдау әдісі жатады.
58. Нарықты салыстырмалы талдау әдісін пайдалану кезінде Қоғам:
59. тиісті тауарлар, жұмыстар немесе қызметтер нарығына зерттеу жүргізеді;
60. әлеуетті өнім берушілерден кемінде үш баға ұсынысын сұратады;
61. ұсынылатын тауарлардың, жұмыстардың немесе қызметтердің бағасы мен сапасының оңтайлы арақатынасы негізінде өнім берушіні таңдауды жүзеге асырады.
62. Сатып алудың қосымша әдістерін қолдану туралы шешімді Тапсырыс берушінің бірінші басшысы тиісті құрылымдық бөлімшенің (лауазымды адамның) негізделген ұсынысы негізінде қабылдайды.

 

7.Сатып алу туралы шарт жасасу және орындау

 

60. Сатып алу туралы шарт сатып алуды өткізу туралы хабарландыруда қамтылған сатып алу туралы шарт жобасына сәйкес жасалады.

Қазақстан Республикасының бейрезидентімен сатып алу туралы шарт жасасу жағдайында Қазақстан Республикасының заңнамасы талаптарын ескере отырып, ол ұсынатын нысанда сатып алу туралы шартты ресімдеуге жол беріледі. Тапсырыс беруші бір қаржы жылынан астам мерзімге шарт жасасуға құқылы.

61. Сатып алу туралы шарт Тапсырыс беруші айқындаған мерзімдерде, бірақ қорытындылар туралы хаттамаға қол қойылған не Тапсырыс берушінің бірінші басшысының бұйрығы шыққан күннен бастап 15 (он бес) күнтізбелік күннен кешіктірілмей жасалады.

Сатып алу туралы шартта Тапсырыс берушінің оны одан әрі іске асырудың орынсыздығы жағдайында шартты орындаудан біржақты тәртіппен бас тарту құқығы көзделуге тиіс.

62. Егер әлеуетті өнім беруші Тапсырыс беруші белгілеген мерзімдерде Тапсырыс берушіге қол қойылған сатып алу туралы шартты ұсынбаса, онда мұндай әлеуетті өнім беруші сатып алу туралы шарт жасасудан жалтарған болып танылады.
63. Сатып алу туралы шарт жобасына өзгерістер енгізуге мынадай өзара байланысты шарттар сақталған кезде жол беріледі:
64. сатып алу туралы шарт жобасына өзгеріс енгізуді тараптардың бірі сатып алу қорытындылары туралы хаттамаға қол қойылған күннен бастап 5 (бес) жұмыс күнінен кешіктірмей бастамашылық жасаған;
65. өнім берушіні таңдау үшін негіз болған сапа және басқа да шарттардың өзгермеуі талабымен сатып алу туралы шарт жобасының сомасын азайту бөлігінде өзгеріс енгізуге жол беріледі;
66. шарт сомасын азайту бөлігінде өзгеріс енгізу туралы шешім тараптардың өзара келісімі бойынша қабылданды.

Осы тармақта көзделген шарттарды сақтамай сатып алу туралы шарт жобасына өзгерістер енгізуге жол берілмейді.

64. Өнім берушіні таңдау үшін негіз болған сапа және басқа да шарттардың өзгермеуі талабымен жасалған сатып алу туралы шартқа өзгерістер енгізуге мынадай жағдайларда жол беріледі:
65. тауарларға, жұмыстарға, қызметтерге бағаны және тиісінше сатып алу туралы шарттың сомасын азайту бөлігінде тараптардың өзара келісімі бойынша, егер сатып алу туралы шартты орындау процесінде осындай сатып алынатын тауарларға, жұмыстарға, қызметтерге бағалар төмендеу жағына қарай өзгерсе;
66. сатып алынатын тауарлар, жұмыстар, сондай-ақ қызметтер көлеміндегі қажеттіліктің азаюына не негізделген ұлғаюына байланысты сатып алу туралы шарттың сомасын азайту не ұлғайту бөлігінде, бұл ретте жасалған сатып алу туралы шартта көрсетілген тауардың, жұмыстың, қызметтің бірлік үшін бағасының өзгермеуі шартымен шартты орындау мерзімдерін тиісінше өзгерту бөлігінде. Тауарларды, жұмыстарды, қызметтерді сатып алу туралы жасалған шартқа мұндай өзгеріс енгізу осы тауарларды, жұмыстарды, қызметтерді сатып алу үшін Сатып алу жоспарында көзделген сомалар шегінде жол беріледі;
67. егер өнім беруші онымен жасалған тауарды сатып алу туралы шартты орындау процесінде тауар бірлігі үшін бағаның өзгермеуі шартымен сатып алу мәні болып табылатын тауардың неғұрлым жақсы сапалық және (немесе) техникалық сипаттамаларын не мерзімдерін және (немесе) талаптарын ұсынса;
68. тауарлардың, жұмыстардың, қызметтердің бірлігі үшін баға өзгермейтін жағдайда, сатып алынатын тауарлардың, жұмыстардың, қызметтердің көлеміне қажеттіліктің азаюына не ұлғаюына байланысты сатып алу туралы шарттың сомасын азайту не ұлғайту бөлігінде. Тауарларды, жұмыстарды, қызметтерді сатып алу туралы жасалған шартқа мұндай өзгеріс енгізу осы сатып алу бойынша қалыптасқан үнемдеу шегінде жол беріледі;

салық, кеден және басқа да салалардағы заңнаманың өзгеруіне байланысты туындаған тауарларды жеткізуге, қызметтерді көрсетуге арналған ұзақ мерзімді сатып алу шартының сомасын азайту немесе ұлғайту бөлігінде, сондай-ақ жылдар бойынша қаржыландыру өзгерген жағдайда шартты орындау мерзімдерін тиісінше өзгерту бөлігінде.

Мұндай өзгеріс енгізуге шарттың бір жыл қолданылуы өткеннен кейін және жылына бір реттен артық емес жол беріледі.

65. Сатып алу туралы шартқа енгізілетін өзгерістер мен толықтырулар шарттың ажырамас бөлігі болып табылатын шартқа қосымша жазбаша келісім түрінде ресімделеді.
66. Жүргізілген (жүргізіліп жатқан) сатып алудың шарттарының мазмұнын және/немесе өнім берушіні таңдауға негіз болған ұсыныстың мазмұнын өзгертуі мүмкін өзгерістерді сатып алу туралы жобаға немесе жасалған шартқа енгізуге жол берілмейді.
67. Сатып алу туралы шартты орындау Қазақстан Республикасының азаматтық заңнамасына және осы Ережеге сәйкес жүзеге асырылады.

 

8.Ереже нормаларын бұзғаны үшін жауапкершілік

 

68. Сатып алу Тапсырыс берушісінің басшылары, комиссия, сарапшы(лар), сатып алу рәсімдерін ұйымдастыру мен өткізуді жүзеге асыратын адамдар, сондай-ақ тауарларды, жұмыстарды, қызметтерді сатып алу процесіне қатысатын өзге де адамдар Ереже нормаларын бұзғаны үшін дербес жауапты болады.
69. Ереже нормаларын бұзғаны үшін қызметкерлерді жауапкершілікке тарту тәртібі Қазақстан Республикасының заңнамасына және Тапсырыс берушінің белгіленген тәртіппен бекітілген ішкі құжаттарына сәйкес айқындалады.

 

9.Қорытынды ережелер

 

70. Әлеуетті өнім берушілер сатып алуды ұйымдастырушының, комиссияның, сарапшы(лар)дың іс-әрекеттеріне (әрекетсіздігіне), егер олардың іс-әрекеттері (әрекетсіздігі) әлеуетті өнім берушінің құқықтары мен заңды мүдделерін бұзса, заңнамада белгіленген тәртіппен шағымдануға құқылы.

Бұл ретте, Тапсырыс берушінің сатып алуды жүзеге асырудан бас тарту туралы шешіміне шағым жасалмайды.