Оқу-ағарту министрлігінің «Talap» КЕАҚ басшысы Санжар Татибековпен сұхбат.

Журналист:

Санжар Мейірханұлы, 21-23 шілде аралығында Ақмола облысы, Щучинск қаласында, «Baldauren» Республикалық оқу-сауықтыру орталығында еліміздегі колледж студенттерінің республикалық слеті өтті. Бұл іс-шараның негізгі мақсаты қандай болды? Слетке қанша адам қатысты және оны кімдер ұйымдастырды?

Санжар Татибеков:

Қазіргі уақытта еңбек нарығы жылдам өзгеріп, жаңа талаптар қойып отыр. Жастарға тек кәсіби білім беру жеткіліксіз – олардың жеке қабілеттерін, әсіресе көшбасшылық, креативтілік, коммуникация және бейімделу дағдыларын дамыту өте маңызды.

Осы бағытта өткен студенттер слеті – жастардың әлеуетін ашуға бағытталған маңызды алаң болды.

Іс-шараға еліміздің барлық өңірінен іріктелген 100-ге жуық белсенді колледж студенті қатысты. Оларды педагог-наставниктер сүйемелдеді.

Слетті ҚР Оқу-ағарту министрлігі мен Ақмола облысының әкімдігі ұйымдастырды.

Журналист:

Мұндай слеттің бүгінгі күні өткізілуі не себепті маңызды деп ойлайсыз? Оның бағдарламасы қандай бағыттарды қамтыды және іс-шараға кімдер қатысты?

Санжар Татибеков:

Жұмысшы мамандықтарға сұраныс күн санап артып келеді. Бұл — ел экономикасының тірегі. Президент 2025 жылды Жұмысшы мамандықтардың жылы деп жариялады. Бұл бастама қоғамдағы еңбек мәдениетін қайта бағалау, техникалық және кәсіптік білімнің беделін арттыруға бағытталған ауқымды реформа. Слет осы реформалардың идеологиялық жалғасы ретінде жастардың назарын жұмысшы кәсіптерге аударып, олардың маңыздылығын нақты іспен дәлелдеді. Біз жастарға: «Сендердің таңдауларың — елдің болашағы» деп айтып келеміз. Ал слет – осы идеологияның жарқын көрінісі.

Слет бағдарламасы мазмұнды әрі жан-жақты болды. Қатысушылар мотивациялық кездесулерге, тренингтер мен мастер-кластарға қатысты. Командалық практикалық тапсырмалар мен soft skills дағдыларын (көшбасшылық, жобалық ойлау, коммуникация) дамытуға баса мән берілді.

Сонымен қатар, Ақмола облысының колледждері кадр даярлаудағы инновациялық шешімдерін таныстырған арнайы көрме ұйымдастырды. Студенттер түрлі заманауи мамандықтармен және технологиялармен танысты.

Слет жұмысына Премьер-Министрдің орынбасары Ермек Көшербаев, Оқу-ағарту министрі Ғани Бейсембаев, Ақмола облысының әкімі Марат Ахметжанов, Мәжіліс депутаттары, жұмыс берушілер мен сала мамандары қатысты.

Ермек Көшербаев мырза атап өткендей: «Біз еңбектің қадірін қайтаруымыз керек. Өндіріс пен экономиканы алға сүйрейтін – сіздер, жастар. Заманауи жұмысшы – технологияны меңгерген, білікті және сұранысқа ие маман.»

Журналист:

Слет аясында техникалық және кәсіптік білім беру саласында қандай жаңалықтар айтылды?

Санжар Татибеков:

Оқу-ағарту министрі Ғани Бейсембаев өз сөзінде ТжКБ жүйесінде жүріп жатқан реформаларға тоқталып өтті: «Қазіргі таңда Қазақстан Қытай, Франция, Түркия, Жапония, Ұлыбритания сынды елдермен бірлесіп 10-ға жуық халықаралық жобаны жүзеге асыруда. Еліміздегі колледждерде халықаралық сертификаттау жүйесі іске қосылды. Сонымен қатар студенттеріміз үшін шетелдік тағылымдамаларға, халықаралық еңбек нарығына жол ашатын үлкен мүмкіндіктер ашылды».

Журналист:

Студенттердің өзі бұл іс-шара туралы не дейді? Жалпы, сіздің ойыңызша, слет қандай нәтиже берді?

Санжар Татибеков:

Жалпы жастар шабыт алып, өз таңдауларына сенімді бола түсті. Мысалы, Жамбыл облысынан келген бір студент қыз былай деді: «Президент Жұмысшы мамандықтардың жылын жариялағанда, біз өзіміздің еңбек жолымыздың қоғам үшін қаншалықты маңызды екенін түсіндік. Бүгінде колледж – бұл саналы әрі болашағы бар таңдау».

Шынында да, бұл іс-шара – болашақ мамандарды қалыптастыру жолындағы маңызды қадам. Біз жастарға өз таңдауының дұрыстығына сенім бердік, еңбекке деген құрметті арттырдық.

Слеттің нәтижесінде жастардың, білім беру жүйесінің және еңбек нарығының арасындағы байланыс нығайды. Жұмысшы мамандықтар – бұл енді жай ғана қажеттілік емес, бұл – болашағы зор, беделді және абыройлы бағыт екенін көрсете білдік деп есептеймін.

Қорытынды:

Бұл сұхбат елімізде жастар мен техникалық білім беру жүйесіне жасалып жатқан нақты қолдаулардың көрінісі. Слеттің басты жетістігі – жастардың жүрегіне сенім ұялатуы, ал болашағымыз – дәл осындай ынталы және білімді ұрпақтың қолында.

Сұхбаттасқан Айғаным Достанбай