“Talap” КЕАҚ “Еңбек адамы – экономиканың өсуі мен ұлттың өркендеуінің негізі” көрмесін Парламенттік тыңдаулары аясында ҚР Парламенті Сенатында Жұмысшы мамандықтар жылы шеңберінде ұйымдастырды.

Көрме білікті мамандарды даярлаудың заманауи тәсілдерін көрсетуге, сондай-ақ білім беру ұйымдары мен жұмыс берушілер арасындағы ынтымақтастықты нығайтуға, кәсіби дайындық сапасын арттыруға және тиімді жұмысқа орналасу жағдайларын жасауға арналды.

🔹 Көрме аясында қатысушылар цифрлық шешімдерді, VR-зертханаларды, дуалды оқыту мен тағылымдамалар бағдарламаларын ұсынды.
🔹 Жұмысшы мамандықтарының болашағы, кадрларға деген қажеттілікті болжау және білім беру процестерін жаңғырту жолдары талқыланды.
🔹 Метағаламды білім беру процесіне енгізу, дуалды оқытуды автоматтандыру және кәсіби бағдар беруге арналған цифрлық платформалар ерекше назарда болды.

Көрмеге ҚР Оқу-ағарту министрлігі, ҚР Ғылым және жоғары білім министрлігі, ҚР Еңбек және халықты әлеуметтік қорғау министрлігі, “Атамекен” ҰКП, “Talap” КЕАҚ, Astana Polytechnic жоғары колледжі, Семей қаласындағы IT және жаңа технологиялар жоғары колледжі, Алматы құрылыс-техникалық колледжі қатысты.

Көрме Қазақстандағы жұмысшы мамандықтарын дамыту және олардың беделін арттыру мәселелерін талқылаудың маңызды алаңына айналды.